Stretch Mo Ko

Sayang.

Konting oras na lang ang natitira bago matapos ang session ko with Gerald. After kasi ng isa pang set ng crunches sa may core exercise area, pupunta na agad kami sa stretching corner, which is malayo kay Mr. Nike.

Doon kasi siya nagpunta pagkatapos niyang nauhaw at uminom sa water fountain. Sa tingin ko pupunteryahin niya ang free weights.

Nakasumbrero pa rin si Mr. Nike. Isang darkbrown na baseball cap with a swoosh sa likod. This time, meron nang naka-plug sa makabilang side ng ulo nya. Earphones lang naman. Nakapuwesto siya malapit sa machine na pangpa-develop ng lower and mid back section, just across a row of dumb bells na iba-iba ang weight and sizes.

Black ensemble siya ngayon. Black ang dri-fit tops with white outlines sa may bandang tagiliran. Black with red lining naman ang gym shorts na suot. Nike trainers na black with gray soles. Both ang shirt and shorts may check logo pa rin.

Nakaupo siya sa isang bench. Nakatutok sa salamin sa harap niya, tila nagko-concentrate sa music na naririnig sa earphones.  Hinanda na niya ang isang pares ng dumb bells. Malalaki. Mabibigat. Kino-condition na ata nya ang arms niya for some curls.

Siya si Mr. Nike.

Hindi ko lubos na naiintindihan ang sarili ko. Bakit ba ako fixated sa kanya? Oso ba siya? Hindi naman siya chubby. I see no traces of fat in his body. He's lean. He couldn't fall into the same category as an otter. Hindi pwede. Baka kasi pag nahulog siya sa grupo ng mga otters, kakainin siya ng buhay. Ulam na ulam na kasi siya. He's super-muscular. He's a hell of a hunk.

Bago pa man siya makapagsimula sa pagbubuhat, natapos ko na ang last set ng abdominal crunches. Tinulungan na ako ni Gerald na tumayo from the A-bench. That time, wish ko na si Mr. Nike ang humila sa akin from the bench.

Hahawakan nya ang mga braso ko sabay hila sa akin pataas. Magpapanggap ako na kesyo nauubusan na ako ng lakas at kunwari'y nahirapan na ako sa pag-angon mula sa bangko. Hihilahin ako ni Mr. Nike. Hihigpitan niya ang kapit sa mga braso ko habang ako nama'y sa mga bulging arms nya kakapit din.

Pagkatayo ko na from the bench, agad akong umeksena na para bang nahihilo at natutumba. Sasandal ako bigla sa matigas niyang katawan. At si Mr. Nike naman, sa kanyang pagkagulat ay payakap nya akong sasaluin. Romantic.

Ambisyosa lang ako. Hibang ng konti. Nag-iilusyon. Potential stalker. Isa akong major major na tagasubaybay ng Wish Ko Lang. Pasulyap-sulyap ako sa kanya. Naglalaway ng konti. Konti lang naman. Hindi ko na batid kung gaano na ako katagal na nagmumukhang aso na may rabies. Hinila na ako ni Gerald papalayo sa eye candy ko at tinulak niya ako sa isang stretching mat.

Ba-bye Mr. Nike. Kami muna ni Gerald ha. Babalikan kita.

Nasa green stretching mat na ako. Naka-indian squat. Yoga position number 1. Breath-in breathe-out. Nasa likod ko naman si Gerald, naka-upo sa isang white exercise ball.

"I-spread nyo po ang legs nyo sir," pa-utos na sinabi ng PT.

Gamit ang inupuang bola, tinulak ito ni Gerald against my back and it stayed that way ng ilang segundo. Sarap ng feeling. Tapos, sinabi niya na yumuko ako't abutin ang paa ko, una sa kaliwa, sunod ang kanan.

"Aray, parang di ko kayang abutin. Sagad na ata. Masakit na po," sambit ko sa kanya.

Di nakinig si Gerald. Tinulak nya lalo ang bola sa likod ko. Na-stretched pa lalo ang mga legs ko. Buwiset.

Inutusan nya akong humiga. Humiga ako flat on my back. Isi-stretch pa nya lalo ang mga binti ko. Hinawakan ni Gerald ang kanang paa ko, hinila ang forefoot pababa, hinila from the ankle down to the toes. Then he folded my leg by the knee and pushed it closer to my body. Hindi na ginamit ni Gerald ang bola. Gamit lang niya ang bigat at pwersa ng kanyang katawan. In doing so, parang he's pushing himself closer to me.

Ako nasa baba. Si Gerald nasa ibabaw. Homo-erotic. Ganun ang position namin sa green stretching mat. Lagpas pa sa 8 counts yun. Hindi ko lang alam kung sinasadya ni Gerald yun. Ayaw ko bigyan ng ibang kahulugan. Right leg pa lang yung inunat. Meron pang kabila. Hmmm

Inalis na Gerald ang weight nya from my leg. Binaba na nya ang kanang paa ko. Si-shift na siya sa kabila. Hinawakan na nya ang kabilang paa. Tinataas, tinitiklop. Hinihila na nya ang paa ko pababa nang bigla na lang siyang nagtanong:

"Sir, kilala mo ba siya?"

"Sinong siya?" tanong ko sa kanya.

"Yung naka-black shirt at black shorts kanina. Yung naka-baseball cap, yung naka earphones," sagot naman ni Gerald.

Napatigil ako. Di ko alam kung ano ang isasagot ko sa kanya. Bakit kaya niya naitanong yun? Usiserong frog. Di kaya obvious na obvious akong nakatingin kay Mr. Nike. Ayeeee. Caught in the act ba ako. Buwiset. Kainis. Makapag-stretch na nga lang.